Texto en bable

Pepa la tuerta

Yera en el mes de Febreru
un llunes pe la mañana,
cuando en ca Pepa la Tuerta
el gallu cacarexaba.

Alredor de so samartín
anduvo toa la semana,
y llavantábase tardi
porque diz que ta cansada.

Fui derecha a la cocina
en sin llabase la cara.
Al dir a encender el llar
vió la masera entornada,
revueltu el escudielleru,
pel suelu rota la xarra,
el tocín esgatuñau
les untaces y la grasa;
una riestra de morcielles
del su varal i faltaba.
Y el gatu de la vecina
saltando pe la ventana.

Al ver tal desbaraxuste
que fai Pepa, agarra un hacha
y fui fecha un vuzcalabria
a casa la señora Xuaca.

Ella que iba voceschando
topó 'l gatu na corrada
comiendo les sos morcielles
en sin platu ni cuyara.

Pepa pegoi co la foz
tan tremenda cuchillada
que quedó ellí patituesu,
sin que más no se alendara.

Y Xuaca en cuantes vió
que el gatu estiró la pata
fui pa debaxu del horru
por una cibiella muy llarga
y fui derecha pa Pepa,
pa dai una gran tocata.

Ven acá, felpeyonaza,
el gatu que te estorbaba.
Si te comió les morcielles
por qué no chasti l' aldaba
-A min tú, veremos ver cuala
lleva 'l gatu al agua. Cochina,
marrana, puerca. Ven, ven
que te doi col hacha.

He de afincate la oreya
y dexate bien marcada.
Ay. que me arrinca la oreya,
sueltami, sueltami la saya.
¡Auxiliu, que m' estocina
esta gocha mariñana!

Acudieron los vecinos,
el pueblu s' aglomeraba,
y el alcalde pedáneo
a las dos las separaba.

Les costes pagoles Pepa,
pagó les morcielles Xuaca,
y ambes estuvieren preses
hasta que el juiciu acabara.

Esto pasó en Les Mariñes.
según un ciegu cantaba
y, por ser LLUNES D' ANTROXO
SIRVIO DE CARNAVALADA.